Joan den larunbatean, urriaren 3an, Donibane Lohitzungo Artxiloako gurutzean, Jean Diharce zena omendu du 150 bat lagunek.

Jean Diharce, Iratzeder Donibane Lohitzungo olerkaria eta bertsolaria zen, apezgoan jardun zen ere hainbat herritan.

Jean Louis Davantek aurkeztu du omenaldi horren karietara agertu den Iratzederren olerki eta bertsoak biltzen dituen liburuxka, ondotik Artxiloara daraman karrikari Iratzeder izena eman zion. Santa Maria eta Santo Tomas eskoletako haurrek olerki zenbaiten irakurtaldia eskeini ondotik, Piarres Larzabal kolegioko bertso-eskolako bertsulari gazteek bertso bana ederki eskeini dite, txalo zarta ederren artean.

Herriko Etxeak eskeini jan-edanaz goxatu gira ondotik bertaratu garen guziak.

Adiorik ez Iratzederri eta ongi etorri bertsulari berriei !

Joan den ostiralean, urriaren 2an, Donibane Lohizuneko Ravel entzun arretoan, itsas bazterrean, hitzordu garrantzitsua genuen San Juan proiektua kari...

Gure lehendakaria eta zuzendariaren hitzen ondotik, Pasaiatik etorritako Jon Maia eta Donibane Ziburuko abesbatzako kantariak entzuteko parada izan dugu.

Hitzak, melodiak eta bertsoek itsasoa ohoratu dute.

Bertso-kantu topaketa hortan, publikoa biziki parte hartzailea izan da eta 1.30ko kontzertua honen bukaeran, 3.eko burasoek orestatutako pintxoen inguruan, gaualdia giro alaia eta umoretxuan bukatu da.

Milesker Jon eta Arin abesbatza zuen sostengurako !

IEP Inklusiorako Egitura Pedagogikoa ideki da kolegioan !

IEP egitura ahalmen urriko 5 gazte errezibitzen dituen dispositiboa da. Helburu nagusia eskola arruntean heien adinekoekin batera bizitzen eta ikasten ahalbidetzea da.

Beharrezkoak edo lagungarriak dituzten tresna guztiak martxan ematen saiatzen dira. Hala nola, batzuetan ikaslea laguntzailearekin joanen da kurtsoetara honek notak hartzen, ulertzen laguntzen edo arreta bideratzen lagunduko dionean. Aldi berean, irakaslearen ahalmen maila hobekiago ezagutzen eta ulertzen ari den heinean, prestatzen dizkio harentzat egokituak diren etxeko lan eta ebaluaketak.

horrez gain, oinarrizko jakitateak finkatzeko eta ikasleen gaitasunen garapena bultzatzeko ikasleari, IEP egiturako irakaskuntza berezitua eskaintzen zaio. Talde ttikitan ari dira, euskarri desberdinak erabiltzen direlarik. Ongizate eta segurtasun sentimendua garatzen du, jakintzak hobekiago barneratzeko gisan.

Helburu nagusiak horiek dira :

- gaztearen autonomia pertsonala eta sozialaren indartzea

- sozial eta eskolako ikaspenak, elkar bizitzarako arauen onarpena baita ere komunikazio gaitasunak hobetzea

- lanbidezko proiektu bat adostea

IEP egiturako irakaslea : Agnes Iturria eta AVS-CO : Peio Sanchez

6D eta 6Ako ikasleek Sokoako harritza litoraleko fauna hobeki ezagutzeko parada izan dute.

Bertan, itsas triku, itsas luzoker, ofiura, anemona, izkira, karramarro... ikusi eta unkitu dituzte baita 6Ako taldearentzat bi olagarro !

Urte hastapeneko burasoen biltzarra irailaren 29an iragan da.

Lehenik, Jabi Sancho lehendakariak, kolegioko antolaketa orokorra aurkeztu du, ikastegiaren kudeaketa eta funkzionamendua. Ekintza desberdinak antolatuz edo komisioetan lan eginez, kolegioa ongi ibiltzeko, burasoen inplikazioa beharrezkoa dela azpimarratu du.

Ondotik, Pantxika Duperou zuzendariak, kolegioko irakasleak eta langileak aurkeztu ditu.

Azkenik, haien haurren irakasle arduraduna segitu dute burasoek. Azaldua izan zaie ikasturteko programazioa mailaka.

Irailaren 29an, asteartez, Elorri Arin, Seaskako inklusio aholkularia kolegiotik pasa da 6.ei desberdintasunari buruzko mintzaldia aurkezteko.

Bi orduz aritu da gela bakoitzean dokumental eta hitzaldiaren bitartez, desberdintasunari buruz hitz egiten egon dira.

Hala nola, lehenik, joko baten bidez, beraren burua aurkeztu dute. Ondotik, ahalmen urritasun mota desberdinak zerrendatu dituzte (fisikoa, auditiboa, bisuala, mentala eta psixikoa...), beraien jatorriak eta adibideekin osatuz. Ikasleen parte hartzea sustatu da, beraien bizi experientziatik oinarrituz. Ikastoletan ahalmen urritasuna duten ikasleei zuzendutako egokitzapenak aipatuak izan dira, egunerokoan ikasleak ikusten ahal dituztelarik.

"Tous ensemble au collège / denak elgarrekin kolegioan" dokumentala begiratu dute ikasleek. Bertan 4 egoera agertzen dira : elbarritua, diabetikoa, mukobisidosaduna eta trisomia. Bukatzeko, termometro joakoaren bitartez, ikasleei hainbat galdera pausatuak izan zaizkie eta erantzunaren arabera, ezker ala eskuinean ezarri dira.

Orokorki, ikasleak parte hartzaileak agertu dira, interesa erakutsi dute gai honen inguruan. Ea egunerokoan desberdintasun guziak onartzen dituzten...

Milesker Elorri !

Ziburuko Piarres Larzabal ikastetxeko seigarrenak, Miarritzetik, Hendaiatik, Senperetik, Saratik, Azkainetik, Urruñatik, Ziburu eta Donibanetik etortzen direnak, irailaren 21 eta 22an Zugarramurdia joan dira, sorginengana. Egonaldi hau ikasleen arteko harremanak sendotzeko, harremanak euskaraz sortzeko pentsatua izan da eta hori urtea hasi bezain laster.

Bi egunez, ekintza eta elkartze anitz bizi izan dituzte :

Irailaren 21ean, kolegiotik abiatu eta, Bertizeko bidea hartu dute parke naturalaren deskubritzeko asmoarekin. Hango bisita ekintza osagarri paregabea izan da. Lorategi botaniko munduko zuhaitzak deskubritu dituzte pista joko bati esker, talde ttikika. Bestalde, parkearen maketa aztertu dute gida bati esker eta filmatxo bat ikusi. Euskalki desberdinak entzuteko parada izan dute. Bisita bukatu eta, Zugarramurdiko bidea hartu dute. Graxiana aterpeko logeletan instalatu eta, Urdazubiko bidea hartu dute oinez, bertako leizeak bisitatzeko. Bi taldetan banaturik, harri negarrak eta harri orratzak aztertzeko garaia izan dute Lamiaren hitzetan. Ongi freskatu eta, Urdazubiko bidea hartu dute. Zentroan sartu eta, itzalean zen xoko batera hurbildu dira... Han arraza desberdinetako hegaztiak ziren itxaroten ari: zikoina, belatza, hontzak, arranoak... Batzuk ikasleen buruetan pausatu dira ere ! Emozio guzien ondotik, Graxiabus hartu dute aterpera itzultzeko. Afari goxo bat eta dutxa bero baten ondotik, Ixabel Milleteki bukatu dute eguna mitologiari buruzko ipuin gauladi batekin.

Biharramunean, irailaren 22an, euri tanten artean, Sorginen erakustokira hurbildu dira, inkisizioaren garaian gertatutakoa deskubrituz eta Akelarreen giroan mugiltzeko, Zugarramurdiko harpeetan ibili dira infernuko errekaren bazterretik pasatuz. Bazkari on bat hartu eta, otobusez Senperen zuten hitzordua, Nestor Bazterretxearen "Oroit Mina" eskulturari buruzko xehetasunak ikasteko, kolegioko HG irakaslea den Iñaki Lecuonaren azalpen sutsuei esker.

Imerzio egonaldi hori bukatu da Ziburun, kolegiora sartu garelarik. Irakasle eta ikasleek oroitzapen goxo bat atxikiko dute, urte osoan biziki probetxugarria izango dena, eta bestetik, kurtsoan landu duten mitologia gaia beste molde batez landua izanez. Lagun berriak egin dituzte eta etxera besterik kondatzen segitu dute.

Zugarramurdiko ateraldia aitzin, Joseba Aurkenerena kolegiora etorri da 6.eko ikasleei euskal mitologia aurkeztera.

Diaporama baten bidez, sinboloak aztertu dituzte, hala nola lauburua, eguzkilorea, naturaren elementuak ere bai : ura, sua, lurra eta airea. Mitologiko pertsonaien ezagutza egin dute : Egu, Gaueko, Basajaun, Mari, Ortzi, Xuhar, Akerra... baita ere sorginak !! Olentzero eta Hartza pertsonaietatik abiatuz, Eguberri eta ihauteriak aipatu ditu.

Ondotik, bi ipuin kondatu ditu Josebak : "Irulea eta katu beltza" baita ere Zugarramurdiko ipuin bat... Ikasle batzuk hasi dira beldurtzen pentsatuz zerbait gertatu zela kolegioko ikasle batzuei hara joan zirelarik... Bukatu aitzin, Zugarramurdiko akelarre baten hitzak abestu dituzte denak elgarrekin :

"Zugarramurdiko leizean / aker bat dago erdian / sorgin mainguak dabiltz /

uju - uju egiten / uju - uju - ujuuuu / beraiek laguntzen

Sasi ta larren artean / uju uju egiten..."

Txirrina jotzean, sorgin gaixtoen aurrean aurkitzen badira, Josebak aholkatu die "Arrio eta belio, izkutuan denari begia irten bekio !" esaldia erratea babestua izateko...

Orain Zugarramurdira joateko prest dira !

Irailaren 17an, Timberlake Wertenbaker antzerkigile ingelesa gure artean izateko xantza ukan dugu. bere antzezlanetako bat lantzeko asmoa eta gogoa genuen aspalditik. Hautatu genuen antzezlana "The Ash Girl", liluragarria zinez, gure ikasleei interesatzen ahal zitzaiela uste genuen, gai nagusia nerabezarotik adin helduago baterako pasaia izanki. Baina hizkuntza artetan zaila egiten ahal zitzaiela ere bagenekien. Zinez, erronka interesgarria izan da guretzat.

Timberlake Ziburun bizi izan zen ttipitan eta bertan eskolarizatua izan zen. Ziburun ttipiago eta euskaldunago bat ezagutu zuela kondatu zigun. gaur egun Londres eta Sara artean bizi da bere familiarekin... Sarak garai bateko Ziburu hura oroitarazten baitio nolabait. Timberlake ingelesez eta euskarazko kurtsoak hasiak dituenez, bukaeran euskaraz irakurri nahi izan die mezu bat. Honen bidez, gure ikasleek Euskara, hizkuntza eder hau, mintzatzeko duten xantzaz ohartarazi nahi izan ditu eta "Herria da gorputza, hizkuntza bihotza" erranez bukatu du.

Irailaren 10ean, ostegunez urdin euskal irratiako Xexili Foix kazetariak 6.en sartzeari buruzko erreportaia baten egitera etorri zaigu...

Herrialde guzietako hirurogei ikasleen gain 15 ikasleek haien experientzia kondatu digute :

Hala nola, zein kezkak bizi dituzten sartu baino lehen : antolaketa berria, materiala kutxak, irakasle desberdinak, gelaz aldatzea, otobusa, jantegia, jolas garaiko jokoak, harreman berriak etabar...

Ordu bateko saio hori biziki aberatsa, unkigarri eta interesgarria izan da. Ahozkoa landu dute haien bizipenak mikroan azalduz. Publikoan zirenak adi egon dira ordu osoan. Azkenean ez zuela deusetarako balio kezkatzea ohartu dira, hain ongi sartu diren gure kolegioko erritmoan !!